«Жасыл даму» АҚ экология саласындағы халықаралық ынтымақтастықты дамытуды қолдайды

Астана халықаралық қаржы орталығының алаңында экология және қоршаған ортаны қорғау саласындағы жаңа технологияларға арналған алғашқы Халықаралық Қазақстан–Беларусь форумы өтті. Іс-шараны Қазақстанның «Байтақ» жасылдар партиясы Беларусь Республикасының Қазақстан Республикасындағы Елшілігімен бірлесіп ұйымдастырды. Форум жұмысына «Жасыл даму» АҚ өкілі қатысты.

Форум аясында қатысушылар қатты тұрмыстық және өнеркәсіптік қалдықтарды қайта өңдеу, су мен ағынды суларды тазарту, энергия тиімділігін арттыру, экологиялық инфрақұрылымды цифрландыру, сондай-ақ коммуналдық жүйелерді басқаруда жасанды интеллект технологияларын енгізу бағытындағы озық технологияларды талқылады. Іс-шараға бейінді министрліктердің, Беларусь Республикасының Қазақстан Республикасындағы Елшілігінің, өнеркәсіп кәсіпорындарының және екі елдің сарапшылық ұйымдарының өкілдері қатысты.

Жасыл экономиканы дамыту, экологиялық инвестицияларды тарту және қоршаған ортаға теріс әсерді азайтуға бағытталған инновациялық технологияларды енгізу мәселелеріне ерекше назар аударылды.

Форум қорытындысы бойынша Қазақстан мен Беларусь арасындағы ынтымақтастықты кеңейтуді, бірлескен экологиялық жобаларды дамытуды, технологиялар алмасуды және тұрақты шешімдерді ілгерілетуге арналған сарапшылық платформалар құруды көздейтін қорытынды құжат қабылданды.

«Жасыл даму» АҚ-ның форумға қатысуы компанияның экология саласындағы халықаралық ынтымақтастықты дамытуға, циркулярлық экономика қағидаттарын енгізуге және экологиялық жүктемені азайтуға әрі халықтың өмір сүру сапасын арттыруға ықпал ететін жобаларды қолдауға бейілділігін растайды.