«Жасыл даму» АҚ Қазақстандағы көміртек нарықтары мен табиғатқа негізделген шешімдерді дамытуға қатысты

«Жасыл даму» АҚ БҰҰ Даму бағдарламасының (ПРООН) Қазақстандағы қолдауымен, BIOFIN бастамасы аясында Қазақстан Республикасы Экология және табиғи ресурстар министрлігінің Орман шаруашылығы және жануарлар дүниесі комитетімен бірлесіп ұйымдастырылған екі күндік оқыту тренингіне қатысты.

Іс-шара көміртек қаржыландыруы саласындағы ұлттық әлеуетті дамытуға және табиғатқа негізделген көміртек жобаларын іске асыруға бағытталды.

Тренингке мемлекеттік органдардың, қаржы және жеке сектордың, ғылыми қауымдастықтың, сондай-ақ көміртек жобаларын әзірлеушілердің 100-ден астам өкілі қатысты. Қатысушылар көміртек нарықтарының қазіргі трендтері, халықаралық стандарттар және көміртек офсеттік жобаларына қойылатын талаптар туралы, соның ішінде базалық желіні қалыптастыру, мониторинг, есептілік және верификация жүйелері жөнінде практикалық білім алды.

Іс-шара барысында Қазақстанда көміртек нарықтарын дамыту мүмкіндіктері жеке инвестицияларды табиғатқа негізделген шешімдерге, оның ішінде орман және ауыл шаруашылығы салаларына тартудың тиімді құралы ретінде талқыланды. BIOFIN бастамасы аясында ҚР Экология және табиғи ресурстар министрлігімен бірлесіп әзірленген Қазақстан Республикасының Орман кодексіне енгізілген өзгерістерге ерекше назар аударылды. Бұл өзгерістер мемлекеттік орман қоры жерлерінде көміртек офсеттік жобаларын іске асыру үшін құқықтық жағдайлар жасайды.

«Қазақстанда орман көміртек офсеттерінің әлеуеті зор, бұл елдің табиғи ресурстарына және климаттық күн тәртібінің өзектілігіне байланысты. Олар климаттық міндеттемелерді орындаудың қосымша құралына айналып, орман жобаларының инвестициялық тартымдылығын арттыра алады. Теңгерімді тәсіл жағдайында орман офсеттері шығарындыларды азайту шараларын алмастырмай, оларды толықтырып, тұрақты табиғи шешімдердің дамуына ықпал ете алады», – деп атап өтті «Жасыл даму» АҚ Салалық құзыреттер департаменті 2 директоры Қасенова Дана.

Осындай іс-шараларға қатысу экологиялық және әлеуметтік жауапкершіліктің жоғары деңгейін қамтамасыз ететін көміртек жобаларын жобалау және енгізу саласындағы институционалдық және сараптамалық әлеуетті нығайтуға ықпал етеді. Бұл Қазақстанның халықаралық көміртек нарықтарына тиімді қатысуы үшін қажетті шарт болып табылады.