«Жасыл даму» АҚ ормандарды қорғауға арналған өртке қарсы техниканы сатып алуға кәдеге жарату төлемдерінен 33 млрд теңгеден астам қаржы бөлді

«Жасыл даму» АҚ ормандарды қорғауға арналған өртке қарсы техниканы сатып алуға кәдеге жарату төлемдері есебінен 33 млрд теңгеден астам қаражат бағыттады. Бұл туралы ҚР Экология және табиғи ресурстар министрлігінің баспасөз қызметіне сілтеме жасап, Kapital.kz іскерлік ақпарат орталығы хабарлады.

Таратылған ақпаратқа сәйкес, Мемлекет басшысының «Таза Қазақстан» экологиялық бастамасы аясында және ҚР Экология және табиғи ресурстар министрлігінің қолдауымен «Жасыл даму» АҚ 2024 жылдан бүгінгі күнге дейін мемлекеттік ұлттық табиғи парктерге, орман резерваттарына, қорықтарға және орман шаруашылығы мекемелеріне арналған заманауи арнайы техниканы сатып алуға 33 121 711 000 теңге кәдеге жарату төлемі қаражатын бөлді.

Осы уақыт ішінде табиғатты қорғау ұйымдары үшін орман және дала өрттерінің алдын алу мен оларды жедел сөндіруге арналған 1 006 бірлік арнайы техника сатып алынды. Олардың қатарында өрт сөндіру автоцистерналары, жол талғамайтын автокөліктер, әртүрлі үлгідегі тракторлар және орман қоры мен ерекше қорғалатын табиғи аумақтарды қорғауға қажетті өзге де техникалар бар.

Табиғатты қорғау мекемелерінің материалдық-техникалық базасын жаңарту олардың өрт қаупі жоғары кезеңге дайындығын күшейтуге, өртке әрекет ету уақытын қысқартуға және табиғи өрттермен күрестің тиімділігін арттыруға бағытталған.

Ең көп қаржыландырылған өңірлер:

• Шығыс Қазақстан облысы – 5,05 млрд теңге, 148 бірлік техника;
• Ақмола облысы – 4,94 млрд теңге, 160 бірлік;
• Павлодар облысы – 4,44 млрд теңге, 136 бірлік;
• Қостанай облысы – 4,10 млрд теңге, 112 бірлік;
• Абай облысы – 3,34 млрд теңге, 82 бірлік;
• Солтүстік Қазақстан облысы – 3,31 млрд теңге, 107 бірлік.

Қазіргі таңда жеткізілген техника еліміздің табиғатты қорғау мекемелерінде пайдаланылып жатыр. Ол өрт сөндіру жасақтарын өрт ошақтарына жедел жеткізуге, аумақтарды патрульдеуге, сондай-ақ орман өрттерінің алдын алу және оларды жою бойынша жұмыстарды тиімді жүргізуге мүмкіндік береді.

Бұған дейін «Жасыл даму» АҚ ормандарды өрттен қорғау жүйесін күшейтуге 16,9 млрд теңге бөлгені хабарланған болатын.

Сонымен қатар, 2024 жылы оператор орман және су шаруашылығының техникасын, сондай-ақ төтенше жағдайлар жүйесін жаңартуға 200 млрд теңге көлемінде қаржы бөлді.

Жыл басынан бері Қазақстанның орман алқаптарында жалпы аумағы 794 гектардан асатын 36 өрт оқиғасы тіркелді.

https://kapital.kz/economic/151262/na-sredstva-utilizacionnyh-platezhej-zakupili-protivopozharnuyu-tehniku-dlya-zashity-lesov.html